KAWRCHUNG

THUFINGTE 28:13
A bawhchhiatna zêptu chu a hmuingîl lo vang a, Inpuanga sim erawh chuan zahngaihna a hmu ang.

Hun rei tawh takah khan kawrchung (Coat), a chhûng leh pâwn hâk theih ve ve hi ‘Turncoats’ tiin a hming an phuah a. A remchan dan ang zela an hak thlâk ṭhin avangin chutiang kawrchung chu ‘Turncoats’ an ti ta mai a ni.

Hmanlai aṭangin Europe ram ṭhenkhat-ah hetiang Coat hi an chîng ṭhin a. A pawn a balh chuan a chhûng lam fai zâwk chu pawn lamah hmangin an hakthlâk ṭhin a ni.

He thumal ‘Turncoats’ phuahtu hi Duke of Saxony a ni e tiin miten an sawi. France ramri depah a awm ṭhin a, Saxon Duke a ni. Mi tam takin an rawn hmu ṭhin a. Turncoats an tih chu a nei a, a chhûnglam a vâr a, a pawn lam rawng chu a pâwl a ni thung.

Nitinin a coat pâwl lam chu a ha ṭhin a, mahse France mi leh sa ten an rawn hmuh dawn chuan a pâwl lam chu chhûnglamah dahin a vâr lam chu a hachhuak ṭhin a. A vâr a hâkna chhan chu anmahni a tihlawm duh vâng a ni.

Tunlai khawvel-ah hian sakhaw mi ṭha tak tak, Chawlhni-a Biak ina inkhawm ṭhulh ngai lo an tam em em a. Ṭhenkhat chu inkhawmna-ah chuan Usher pawimawh tak, thawhlawm khawntu, ṭantu, thusawitute an ni ṭhin.

Mahse chawlhni a zo a, Biak in pâwnah an kalchhuak a, khawvêl mite nen angkhatin an tla leh dual dual mai ṭhin. Chungmite chu a ni, ‘Turncoats’ ha tute chu.

Jeremia 16:17 “An awm dân zawng zawng ka hmu reng a, hmuh loh rêng rêng ka nei lo; an sualnate ka hmuh phâk loh a awm hek lo.”

Ephesi 5:12 “A rûka an thil tih ṭhinte chu a sawi pawh a zahthlâk si a.”

LUKA 12:2 – Eng mah thup hlen theih a ni lo, a lang leh mai ṭhîn; eng mah zêp hlen theih a ni hek lo, hriat chhuah a ni leh mai ṭhîn.