TAIMAK LEH THAWHRIM

GENESIS 3:19
I lo pian chhuahna leia i kîr leh hma chu thlansaphûlkaiin ei i zawng ang.

Mihring suala a tlûkna hian eizawnna kawngah pawh taimak leh thawhrim a tingai zual niin a lang. Hmaia thlan tui luang zawih zawiha thawk peih lo tân chuan ei hmuh hleih theih a ni lo. Kut tling lo leh hahdam taka hmuh chhuah ang chi reng reng hian a daih rei ngai lo tih pawh hre tel ila. Awlsam taka sum neih chu a ral thuai a, Harsa taka thawh chhuah chu a pung zêl ṭhîn. (THUFINGTE 13:11)

Kan Pathian hi Pathian taima a ni a, amah ringtute pawh kan taimak ve a ngai. ‘Tûn thlengin ka Pa chuan hna a thawk reng a, kei pawhin amah angin ka thawk zêl a ni’ tiin kan Lal Isua pawhin a sawi a (JOHANA 5:17). Tirhkoh Paula ngei pawhin taima leh thawkrim tûr kan nih zia a hriat chian êm avangin Kret thliarkara kristiante a fuih a, ‘Kan mite chu tlâkchham an neih ngai loh nân hna ṭangkai thawka inhmang reng tûrin fuih la, an awm mai mai tûr a ni lo.’ a ti hial a nih kha (Tita 3:14).