RAWNGBAWLNA RILRU PU-A THAWH

KOLOSA 3:23-24
In tih apiangah mihring rawngbâwl ang ni lovin, Lalpa rawngbâwl ang zâwkin tih tak zetin ti ang che u. Lâwmman atân ro luah tûr Lalpa hnên aṭangin in hmu dâwn tih hre reng rawh u. Lalpa Krista rawng in bâwl a ni e.

Tirhkoh Paula rawngbâwl lai khan kristian zingah bawih an awm ve a. Bawih hoten an pute hna a ṭul ang ang an thawhsak chu Pathian rawng an bâwlna niin Paula’n a sawi. Bangalore khawpuia State Secretariat Building hma lamah chuan ral aṭang pawha chhiar theih tur hian, ‘Sorkar hna hi Pathian hna a ni’ tih Sap ṭawnga inziak an tar kulh mai a, mitthlaah a cham reng mai!

Sorkar hna a ni emaw, Company lam hna a ni emaw, pâwlho hna a ni emaw, mi dang hna a ni emaw, kan thawh apiang hi Pathian rawngbâwlna a ni tih hriaa kan thawh a pawimawh. Kohhran chauh hi rawngbâwlna tûr a lo ni bik lo, ni tina kan eizawnna hna kan thawh hi rawngbâwlna a ni vek a ni. Chuvangin Pathian mit hmuha lawm tlâkin i thawk ang u.