CHHEL TAKA TUAR

JOBA 2:9
A nupui chuan a hnênah “I rilru ngai i pu reng dâwn em ni? Pathian sawichhia la, thi la a ni mai,” a ti a.

Setana’n tuarna remchânga a lâk thiam dan hi ringtu te hian kan theihnghilh tûr a ni lo vang. Mihring nunah hrehawmna te, manganna te, tlâkchhamna te, natna te, thihna te leh a dang te a lo thlenin vui maite a awl hlê. Pathian meuh pawh hmangaihtu Pathian a nihna anga ngai lo va, tuartirtu leh hleihnei Pathian ang tein kan rilruah a rawn lantîr a. Hmangaihtu thiltih dân tûr ni lova kan ngaih theih nân ngaihtuahna dik lo min siamsak fo ṭhin niin a lang.

Joba pawh kha a nupuiin Pathian sawichhia a, thi mai tura thu a râwn khan, “…Pathian hnên aṭangin thil ṭha kan dawng a, thil ṭha lo pawh kan dawng lo vang em ni?” tiin a chhâng a. Chhel taka a tawrh chhuah hnuah a hmaa a neih lêt Pathianin a pe leh ta anih kha! Tuarna a lo thlen pawha chhel taka tuar chhuak ve thei tûrin chhungkua i inbuatsaih ang u.