BARNABA

TIRHKOHTE 4:36-37
Tin, Josefa, tirhkohten Barnaba an tih (chu chu ‘Thlamuanna fa,’ tihna a ni), Levia chi, Kupra thliarkâra mi pawh chuan, ram a nei a, a hralh a, a man chu rawn kengin tirhkohte hnênah a hlân a.

Kan hriat angin Barnaba hi a tîrah chuan Josefa tih a ni a. Zirtirten Barnaba tia an koh dân hi a lârpui ta zâwk niin a lang. A hming awmzia hi “Thlamuanna Fa” tih a ni a; ṭhian thlamuanpuiawm tak anih avânga Barnaba ti ta pawh an ni mahna le.

Barnaba rawngbâwl dân hi langsâr viau lo mah se a pawimawh hlê a. Ringtu dangte zînga Paula titlângnêltu leh chhawmchhuaktu a ni a. Paula a chhawm chhuah bâkah Marka siam puitlingtu a ni a, Chanchin Ṭha Marka ziak kan neih theihna chhan pawh hi Pathian dawtah chuan Barnaba hi a ni kan ti thei ang.

Kohhran leh pâwlhovah pawh hian mi langsâr lêm lo ṭangkai tak an awm ṭhin a. Hetiang mite hi Kohhran leh pâwlho hlawhtlinna bul an ni ṭhin.