TUIHÂL REHNA

JOHANA 4:13-14
Isuan, “Tu pawh he tui in apiang an tuihâl leh ang; tu pawh an hnêna ka pêk tûr tui in erawh chu an tuihâl leh tawh lo vang. An hnêna ka pêk tûr chu, an kawchhûngah tuihnaah a lo chang ang a, chatuan thlengin a kang lo vang,” a ti a.

He thu hi Samari hmeichhia Lal Isuan a counsel-na thu a ni a. Mihringin Pathian dân a bawhchhiat avângin khawvêl hi tuihâl dân chi hrang hrangin a tui a hâl a. Chu mihringa tuihâlna tihreh nân chuan a ṭhen sakhaw lamah an tlân a, a ṭhen zu leh ruihhlo lamah an tlân a, a ṭhen sex lamah an tlân a, a ṭhen sum leh paiah an tlân a. Mahse hêng zawng zawng hi mihringa tuihâlna tulhtlai turin a tling lo, tuihâl tizualtu mai an lo ni! Lal Isuan a pêk chatuan nunna tui in apiang erawh chu kum khuain an tuihâl leh tawh dâwn lo a ni –

Nang, Eden natna veitu kha,
Lo kalin va in thuai la;
Tin, Kalavari tui fim tak kha,
I thinlungah a luang ang.