KRISTIANTE HUNPUI

MARKA 16:6
Tichuan, ani chuan an hnênah, “Hlau suh u, Nazaret Isua, an khenbeh kha, in zawng a ni âwm a, kaihthawh a ni tawh a, hetah a awm tawh lo; en teh u, an zalhna chu hei hi a ni.

Kristian chhûngkaw pangngaia piang leh seilian tan chuan Good Friday leh Easter Sunday te hi thil thar a ni lo.

Khawthlang ram lamah chuan chawlh hun (Holiday) pakhat pawimawh tak a ni ta deuh ber tawh. Easter egg te, easter cake tihte chuan Easter kan hman chhan tak; Isua kan tân a thih a, a thawhlehna-ni a ni tih min theihnghilh tîr ta. Bazarpui-ah te chuan easter denchhenin inhralh nawm nân an thil zawrhte an titlâwm ṭhin a. Easter kan hman chhan ber Isua aiin easter egg/cake te a lâr ta zâwk a nih hi.

Hetiang dinhmun hi kan ramah hian la thleng êm lovin lang mah se; kan hlat lutuk tawh lovin a lang. Kristianna hi kan hnam culture pakhat a nih tawh tlat avangin, Isua thihna leh thawhlehna te paw’n kan nun-ah thu a sawi ring tak tak thei ta lova; serh leh sang pakhat ve mai a ni ṭan ta deuh der mai!

Easter egg leh Lal Isuan kan tân a tawrhna leh min chhandamna hian inzawmna rêng a nei lo. Khawvêlin kan kristian hun hlu min tih hmêlhem sakna hmanrua mai a ni ta.

Kristianten kan hunpui, Good Friday leh Krismas kan hman dânah mahni inenlêt ṭheuh ila, kawng eng emaw tal chuan insiamṭhatna tur kan nei ṭheuh awm e.

Kan rin Lal Isua duh dân leh khawvêl duh dân hi thil inpersan, hrang hlak, kal kawp thei lo a ni a. Khawvêl changkang zêl mah se heng kan hunpuite hi urhsun taka kan kalpui a ṭha ang.

“Kan nung a kan thi a; Krista erawh a thi a a nung a ni” – John Stott