NAUTE RILṬAM

ISAIA 49:10
An ril ṭâmin an tui a hâl ngai lo vang a, Thli lum leh chhûn ni sa hrehawm an ti hek lo vang. An hruaitu chuan a lainat a, Tui tlan tûr awmnaah a hruai dâwn si.

A lalṭhutthleng aṭanga a thu vawi khat sawia khawvêl her danglam thei Pathian kan nei tih kan hria em?

Nausên chu bâwnghnutea châwmlen a nih ang bawk hian Kristiante pawh hian bâwnghnute kan mamawh a, chu chu Pathian thu hi a ni. 1 Petera 2:2-ah chuan, “Nausên piang hlim angin thlarau lam hnutetui eng mah pawlh loh chu châk rawh u, chutiang ring chuan in ṭhang lian thei ang a, chhandam in ni dâwn nia” tih kan hmu.

Nausên chu a dam loh chuan Doctor hnênah entîr a ni ṭhin a. Chuti ang bawkin Thlarau lama kan ṭhanlen kawngah harsatna emaw dam lohna kan neih chuan kan Doctor Isua hnênah kan inentîr tûr a ni. Chutah chuan ani chuan a thutak min lo chawh ngei ang.

Kan pianthar khan Bible ABC hi kan thiam lo va, mahse thlarau chaw kan mamawh êm avângin Bible chu kan keuva, kan han zir ṭan ta a, muang chângin kan lo thiam chho zel a, Pathian chuan min ṭanpui zel bawk a, thlarau lam chaw kan ei ṭhat avâng chuan vawiinah chuan thlarau lamah chuan nausên mai kan lo ni ta bîk lo a ni.

Thlarau nuna Kristiante hlawhtlinna ber chu Pathian thua rilṭam hi a ni. Lal Isua’n Johana 6:35-ah khan, “Kei hi nunna chhang chu ka ni; ka hnêna lo kal tawh phawt chu an rilṭâm lo vang, kei mi ring chu an tuihâl ngai lo vang” a ti a nih kha.

Sakhi luite tui châk angin Pathian thu hi hriatchian lehzual kan châk em? A felna chu châkin kan thaw huam huam em?