ZU IN CHUNGCHANG

THUFINGTE 23:29-30
Tute nge chungpik ṭhîna, tute nge lungngai ṭhîna, tute nge inhau ṭhîn? Tute nge thubuai nei ṭhîna, tute nge a vâng awm lova hliam tuar ṭhîna, Tute nge mit sen rêm rûm ṭhîn le? Zu hmuna awm reng ṭhînte, Zu chawhpawlh in ṭhînte an ni.

Zu hi miin a in thiam a, mi pawi a sawi loh chuan pawi ti lo anga ngai mai duh pâwl an awm ṭhin. Zu hi a in thiam tak tak theih loh. Zu in thiam intite pawh Bible-in tumah thiamchantîr a nei dâwn lo; an chung a pik a ti zâwk a ni.

Zu in hi zahawm lova min siamtu, sawi loh tur tûr min sawitîr ṭhintu, insûmtheih lohna min petu, chapova min siamtu, mi dang chunga kut min thlâk tîrtu, chhûngkuaa tlâkranna thlentu, ram leh hnam hmêlma a ni a. Kan Bible hian zu ruih hmangte chu hremhmun kal tûra a tihte an ni (I Kor. 6:9,10). Zu hian ṭantu a ngah hlê a, ṭan chhan ṭha erawh a nei rêng rêng lo. Zu in thiam sawi mawi an awm leh ṭhin hi a pawi, Mizoramah an awm loh nân i ṭawngṭai zêl ang u.