AMEN NUN

– Chhantea (Oriela patea)
E. Lungdar

Amen hi Mizo ṭawng chuan ni e, ni rawh se, remtihna ang tluk niin mithiam ten an sawi ṭhin.

Kan sakhaw ṭawng hmangah Mizo kristiante hian kan hmang nasa êm êm a. Kan ṭawng tuallêng ang maiin kan hmang anih tâk ber hi. Mahse, Amen nun tak tak hi kan chungah Pathian rorêlna lo thleng se Amen kan pe thei ang em tih hi ka ngaihtuah fo ṭhin.

Pathian, engkim chunga rorêltu leh thuneitu hian kan beisei leh duh ang ni lo hian kan chungah rorêl ta se. Chu chu kan ṭhatna tûr anih hi tiin Amen kan pe thei ang em le? Amen hi sawi nuam tak, nun chhuahpui harsa tak a ni mai lo ang maw?.

Chhûngkaw pakhat ka hriatchian êm êm hi an fatlum ber, M.A. zo hlim, an innghahna, a nu leh pa ten anmahni châwm tûra an beisei mêk chuan missionary ni tûra kohna a dawn laia a nu leh pa rilru a sawi khan… he lei tisa ngaihtuahna chuan Amen nun neih a har an ti kha ka dem lo.

An chaw bêl nghahfâk, sawrkar hna ṭha tak thawka in leh lo dinna tûra an châwm an beisei kha missionary a kal a ngai a. A kalna atân an eizawnna sumo hralh a la ngai zui. Tisa chuan huiha ti pawk pawk mahse ka dem lo rêng rêng. Khatiang khera an fapa Pathianin a ko kha Amen a har fû in ka ring.

Mahse, an fapa missionary in a kal a. An eizawnna sumo an hralh a. An tlaran vek ang chu tih laiin tunah chuan concrete in ṭha tak an sa a. Chaw an nghei thu kan la hre lo. Amen nun nei tûra chunglam remruatna hi mihring hian kan lo man pha lo mai mai zâwk a lo ni.

Mizo te hi Pathian kan rin dân leh kan sawi dân hi a inang lo lutuk a. Kan sawi dân ah chuan engkimtithei, vêngtu leh enkawltu, engkim chunga rorêltu anih thu kan sawi châmchi a. A Pathian zia te nên lam kan sawi thei. Kan rin dân thungah erawh chuan engkimtitheiah kan ring lo nge ni. Khâm sâng takah tla palh ila chu… Pathian zâr a awm lo te kan ti a. A rorêltu nihna kan chungah a lo thleng dâwn a, duh kan lo thlang zut zut a. I thu ang zêlin ka chungah thleng rawh se tih lam chu a hnai lo. Lalpa i duhna apiangah min tîr rawh, mahse Tuikuk ramah ni lovin tih fiamthu ang deuh khan… a rorêltu nihnaa a rorêlna te hi kan rin duap tlat zêl. Pathian hi kan duh min tihsak a, kan beisei min tih hlawhtlinpui tûr atân kan duh viau a. Kan chunga rorêltu atân a rêl sak a awm a, a tirha awm tûra kan chunga thunei tûr chuan Amen kan ti leh thei si lo hi kan inenfiah fo a ṭul âwm e.

Isua khan keini ang lek rilru pu in… kross a thihna ngei kha Amen nun lo pe thei lo se, chhandamin kan awm ang em? Thihna khawp hiala lungngaih ai chuan ti zâwk hian keini angin a tisa duhna ti lang ve se engnge tunah kan dinhmun tûr. Mahse Isua chuan, “Aw ka Pa, a theih chuan he no hian mi pêl hrâm teh se; nimahsela, ka thu ni lovin nangma thu thu ni zâwk rawh se,” a ti a (Mat. 26:39).

Amen nun kan pêk nan, Pathianin a thu malsawm rawh se.