ADONI-BEZEKA

RORELTUTE 1:7
Tin, Adoni-bezeka chuan, “Lal sawmsarih kutzungpui leh kezungpui tan chhumte chuan ka dawhkân hnuaia buh mal an chhar ṭhîn a; ka tih ang chiahin Pathianin mi thungrûl ve ta a nih hi le,” a ti a. Tin, Jerusalem khuaah an hruai a, chutah chuan a thi ta a.

Adoni-bezeka tih awmzia hi ‘Bezek lal’ emaw ‘Bezek khaw lal’ tihna emaw a ni. Adoni-bezeka hi lal râwng tak a ni a. Tun hmaa lal sawmsarih indonaa a lo man tawhte kutzungpui leh kezungpui a lo tansak tawh a. Juda-hovin indonaa an hneh ṭumin an man a, lal dang chunga a tih dan ang chiahin a kutzungpui leh a kezungpui an tansak ve a, ‘Ka tih ang chiahin Pathianin mi thungrûl ve ta a nih hi le’ a ti zuai raih mai a ni.

Mite chunga râwng taka cheho hi râwng taka sawisakin an awm ve duh khawp mai. Mizoram buai lai pawh khan a-zo-a-vâiin râwng taka che hote chu râwng taka thungrulhin an awm a. Khawngaihna ngah takte chu khawngaihna vêka thungrulh an ni hlawm emaw tih tûr a ni. Kan tuh rah kan seng ṭhin, i fimkhur tlâng ang u.