FATE TANA HUN HMAN

THUFINGTE 22:6
Naupang chu a kalna âwm kawngah chuan zirtîr ula, A upat hun pawhin a thlah lo vang.

Nikhat chu nu pakhat hian a fate pahnih hi park-ah a lên pui a. Chutia a fate an infiam lai chuan a bulah chuan lehkhabu chhiar pahin a lo nghâk a. A ṭhutna bulah chuan pa pakhat hi a lo ṭhu ve bawk a.

Chu nu chuan, “En teh, kawr pâwl hate saw ka fate an nih saw” a ti a. Pa pakhat chuan, “A sen ha saw ka fapa a nih saw” a lo ti ve bawk a.

Chutia hlim taka an fate an infiam lai chuan, pa pakhat chuan a fapa hnenah, “Todd, kan haw thei tawh ang em?” a ti a. A fapa chuan, “Minute 5 leh lawk aw” tiin a rawn chhâng a.

Minute 5 a liam chuan a pa chuan, “Todd, haw a hun tawh e” a ti leh a. Mahse a fapa chuan, “Ka pa, minute 5 leh lawk, minute 5 tak tak a ni ang” a rawn ti leh a. A pa chuan a nghâk leh ta a. A bula ṭhu nu pakhat chuan, “Pa zaidam tak i nih hi maw le” a ti a.

Chu pa chuan nui pahin, “Hmanni deuh lawk khan helai hmunah hian ka fapa upa zâwk Tommy-a chu zu rûi khalh motor-in a sut avangin a lo thi tawh a, a chhan chu amah vêngin a kiangah hun ka hman tam loh êm vang a ni tih ka inhrechhuak a, tihsual ka tum tawh lo. Todd-a tân minute 5 chauh te chu ka la pe hman em em tho atin ni” tiin a chhâng a.

Dr. V. Raymond Edman-a, Wheaton College President chuan ti hian a testimony a sawi, ‘Ka fate ka enkawl dân ka ngaihtuah lêt hian, kîr leha a bul ṭan ṭha tûr chu ni ila ka fate bulah hian ka hun tam zâwk ka hmang tawh ngei ang’ a ti bawk.