HREM DAN HRIA

2 PETERA 2:9
Lalpa chuan amah ṭihtute chu tuarna laka chhan chhuah dân leh rorêl Ni a lo thlen hma pawha mi sual hrem dân a hria.

Vawi khat chu Switzerland tlâng ram nuam tak mai hi tourist nu pakhat hian a tlawh a. Chu lai tlâng nuam takah chuan Berâm vêngtu leh a berâm lo awmte chu a hmu a. An sîrah chuan berâm pakhat natna tuara lo bawk hi a awm a, a ke a tliak a. Chu nu chuan engvanga nâ nge tih a zâwt a.

Berâm vêngtu chuan, “Thu a awih lo va, a ke ka vaw tliak a nih kha” tiin a chhâng a. Sawi chhunzawmin, “Heng berâm zawng zawng zîngah hian thu a awihlo va, a duhnaah ama thuin a tla fâl a, ka kohna leh aw a hre duh lo va, tûnhma aṭang tawh harsatna mi siam fo ṭhin vang a ni. Chuvangin hlauhawm laka kan him zâwk nân a kê ka tihtliah sak ta a ni.

A nikhatnaah chuan ka chaw pe tûr chu min lo seh a tum a, ka kalsan a, ni tam tak ka hnaih duh ta lo va, mahse a chau hlê a ni tih ka hriatin ka va pan leh a, ka chaw pêkte chu ṭha taka ei mai lovin, ka kutah te chuan min lo liak ta niap niap mai a.

Thil pakhat ka hrilh ang che. He berâm hi a dam leh hunah emaw tûn aṭang tawh hian berâm dangte aiin thu a awih tawh zâwk ngei a. Berâm dangte aiin ka kohna aw pawh a hre hmasa ber ta zêl a ni. Berâm dangte aiin min hnaih berah a awm ta zêl bawk” tiin a chhâng a. Chu nu chuan thil awmzia chu a hrethiam ta a ni.

Hebrai 12:25-ah chuan tihian kan hmu, “Thu rawn sawitu hi in lo hnar hlauh dah ang e, fîmkhur rawh u. Leia an hnêna thu sawitu lo hnarte mah khân hrem an pumpelh si loh chuan, vân aṭanga thu rawn sawitu kan lo hawisan hlauh chuan hrem kan pumpelh lo lehzual ang.” tiin.

Mihring siamṭha tûr chuan khawdur a ngai an ti ṭhin a. Mahse chung a thlen kher ngai lova kan kawng kan chhût ngun a pawimawh hlê mai.

MATHAIA 5:29
I taksa a puma hremhmuna paih a nih ai chuan, i taksa pêng pakhat boral chu i tân a ṭha zâwk e.