PATHIAN THUAWIH

PHILIPPI 2:8
Tin, mihring anga lo awmin a inngaitlâwm a, thi khawp hiala thu zâwmin a lo awm ta a, krawsa thihna ngei chu.

Mizorama Kristian hmasate chu ‘Pathian thuawih’ tih an ni ṭhin. Kan Bible-a kan hmuh angin Pathianin a mite chu tih tûr leh tih loh tûr a hriattîr ṭhin a. Thuawih taka a thu zâwma a duhzawng titute hi a thuawihtute an ni. Nova nunah te, Abrahama nunah te leh zâwlneiho nunah te khan Pathian thu an awihzia kan hmu tam hle. Lal Isua nun leh thiltihah hian Pathian thu a awihzia a lang chiang hl a. Pa thupêk zâwma thih thlenga a tawrhna chuan chawimawina a khumtîr ta hlauh zâwk a nih kha!

Mahni tâwk ṭheuhvah thuawih taka tih tûr kan nei theuh mai. Thlarau Thianghlim pawhin kan tih tûr leh tih loh tûrte min hrilh ṭhin a. Mualpho pawh dawn chang lo khawpa a thu zâwmtute chu thlarau malsawmna pawh pêk belhin an awm zêl ṭhin. Thlarau mi kan tih pawh hi thil dang teh vak niin a lang lo, Pathian thuawihte hi ‘thlarau mi’ an lo ni maiin a lang.