CHUNG LAM THLIR

FILIPI 3:20
Keini zawng vân khua-leh-tui kan ni si a, min chhandamtu Lalpa Isua Krista vân aṭanga lo kal tûr chu nghâkhlel takin kan thlîr a ni.

He leia awm kan nih avangin lei lam thilte-a rilru ngaihtuahna hman hi a awl êm êm mai a. Lei lam thilte-ah chuan lungngaihna, harsatna leh manganna chi hrang hrang a awm a. Chûngte chuan kan nun a tibuai fo ṭhin a ni.

Tlangval pakhat hian vawi khat chu kalkawngah Dollar thîr pakhat hi a chhar hlauh mai a. Chuta ṭang chuan a kawng kal apiangin lei lam chauh a thlîr ṭhin a. Kum 30 a tlin meuh chuan thil tam tak a chhar a. Chûng zîngah chuan Dollar 3.95 te, kawrkilh 18,203 lai mai te leh pin 34,309 lai a chhar bawk.

Mahse chu tlangval chuan a thil chharna lamah leh kawnga a thil zawn avangin kâwng-nâ a neih phah a, hnungzâng nâ a neih phah bawk.

Chumai a ni lo a, ni êng mawi tak mawina chu a hre lo a, a ṭhiante hlimna leh lâwmna a hmu ngai lo a, pangpâr leh thingkûngte mawina reng reng a hre ngai lo bawk. Vân dum pâwl leh chhûm paw riaite chuan a nunah hlimna an pe zo lo va, a thil chharte avang chuan harsatna namên lo a tawh phah ta a ni.

Lei lamah kan thinlungte i dah lo vang u. He khawvêla thil awmte chuan harsatna min thlen ṭhin a, lungngaihnaten min chimbuai ṭhin.

Lei nun buaina kârah pawh Lal Isua lam kan en tlat chuan hlimna leh lâwmna te, thlamuanna leh ṭhatnaten min vûr ṭhin a ni. Kolossa 3:2-ah chuan, “Chung lama thil awmahte chuan in rilru nghat tlat rawh u, leia thil awmahte chuan nghat lovin” a ti a ni.

Krista hnênah kaihthawhin in awm ve tawh chuan chung lam, Pathian ding lama ṭhu Krista awmnaa thil awmte chu zawng rawh u.