CHÂKNA CHAWPA BORAL

1 JOHANA 2:15
Khawvêl hi hmangaih suh ula, khawvêla thil awmte pawh hmangaih hek suh u. Tu pawhin khawvêl hi a hmangaih chuan, Pa chu a hmangaih lo va ni;

Africa ramah chuan Zâwng (Monkey) man dan ṭha tak an hria a, an ram Zâwng (Monkeys)-te chuan buh hmui (rice) an duh em em mai a. Huan leh lo neitute chuan coconut kung-ah hian Zâwng kut leng tâwk vêl chiah chiahin kua an siam a, a chhûngah chuan buh hmui an dah ṭhin a ni.

Chutiang chuan an coconut kungtin deuh thawhah chuan kua an siam ṭhin a. A chhûnga buh hmui rimtui tak an dah chu zâwng chhungkuain an lo hria a, ei tumin an pan ṭhin a. Zâwngte chuan an kuta lâk tumin a kua chu an han zen a, a tam thei ang ber an han ṭham a, mahse an kuta buh hmui hum chung chuan an kut an la chhuak thei ṭhin lo a ni.

Buh hmui ṭham chhuah an tum tlat avângin an tâng reng ṭhin a, chuveleh lo neitute chuan an rawn man ta ṭhin a ni. Zâwngte chuan buh hmui chu ṭham chhuah tum lo se an talchhuak thei mai tur a ni a. Mahse an duhâm avangin an nunna chuan a tawrh phah ta ṭhin a ni.

Africa rama zâwng te aṭang hian zir tur tam tak kan nei. Pakhatna-ah chuan mi tana kut hum lui tlatte chuan malsawmna an dawng thei ngai lo a, nun zalenna leh lawmna pawh an nei thei lo ṭhin a, an nun a hrehawm em em ṭhin a ni.

Tin, he khawvel thilte hmangaih tlata kalsan thei lo leh thlah thei lote chu an châkna chawpin an boral dawn tih Bible-in min hrilh kha. Zâwngin a châkna a boralpui ang kan nih ve lohna turin min tiboral thei thilte chu i thlah ve ang u.

1 JOHANA 2:16 – Kkhawvêla thil awm zawng zawng – tisa châkna te, mit châkna te, mahni sum uanpuina te hi Pa hnên aṭanga chhuak a ni lo va, khawvêl aṭanga chhuak a ni zâwk e.