REMNA SIAM

FILIPI 2:3
Mahni hmasial tak leh inngaihlu taka eng mah ti lovin, tu pawhin inngaitlâwm takin mi dangte ṭha zâwkah dah rawh u.

Kohhran pakhatah hian mi pangngai vak lo leh inmil vak lo pahnih, Wong-a leh Ang-a te hi an awm a. An Pastor chuan a hrethiam em em a. Nikhat chu an Pastor chu Wong-a hnênah a kal a, “Ang-a hi engtin nge i hmuh dan?” tiin a zâwt a. Wong-a Chuan, “Ang-a maw! Putar uikawm tak a ni. A bula awm hi ka thil peih loh zâwng tak a ni, ka mil lo,” tiin a chhâng a.

Pastor chuan, “A ni mai thei e, mahse an chhungkua-ah chuan mi ṭangkai leh fel tak a ni tihte chu i hriatpui a ni lawm ni?” a ti a. Wong-a chuan, “Chûngte chu tumahin an hai hleinem, chumi kawngah chuan a fakawm a ni mai thei e,” a ti a.

Pastor chu Ang-a hnênah a lêng leh a, “Wong-a hi engtin nge i hmuh dan?” a ti a. Ang-a Chuan, “Wong-a te chu mi pangngai lo, thinlung nei lo ang a ni. A sumdawnna chiah a ngaihtuah,” a ti a.

Pastor chuan, “A nih leh Wong-an a sawi dân che kha i hre ve em?” a ti a. Ang-a chuan, “Hre chiah lo ve, ka chhiatna bâk a sawi nang,” a ti a. Pastor chuan, “Ni lo e, Wong-a chuan pasal ṭha tak leh pa ṭha tak i nih thu min hrilh a,” a ti a. Ang-a chuan, “Chuti maw, a va mak ve,” a ti a. Pastor chuan a tih tak tak thu hrilh pah chuan, “A nih leh engtin nge Wong-a chu i hmuh ve a?” a ti leh a. Ang-a chuan, “Ka hrilh tawh che kha, khawngaihna tlachham mi a ni,” a ti leh a. Pastor chuan, “A ni mai thei e, mahse a sumdawnna kawngah chuan a ti tak tak a, mi entawntlâk tak ni chuan i hre lo maw?” a ti a. Ang-a chuan, “Ni e, chuti zâwnga thlîr chuan a dik narawh e,” a ti a.

Chumi tlai chuan Pastor chuan Wong-a chu a tlawh haw a, Anga’n mi fing tak a ni a tih thu a hrilh haw a, mak a ti em em a. Chawlhni lo awm hmasa bera an han inhmu chu kum tam tak innuih tawh lo kha an innuih leh thei ta a ni.

MATHAIA 5:9 – Remna siamtute chu an chan a ṭha e, Pathian fate tih an la ni dâwn si a.