ROPUI BER VAN
HEBRAI 11:16
Ram ṭha lehzual, vâna awm chu an ngai zâwk a ni. Tichuan, Pathian pawhin an Pathian nih a zak lo va, an tân khua lam a lo buatsaih tawh a ni.
Kum 2009 daih tawh khan khawvêl ram hrang hranga zin kual ṭhin (tourist) mi 10,000 chuang te chuan khawvêl khawmualpui hrang hranga thil siam mawi tak tak te chu a mawi dân indawtin an thlang chhuak a.
France ram Paris khawpuia Eiffel Tower chu an mittlungtu ber anih avângin pakhatna-ah an thlang a. A dawttu chu Rome ram Vatican City-a St.Peters Basilica a ni a. Pathumna chu India ram Agra khawpuia awm Taj Mahal a ni leh a. A dangte chu Golden Gate Bridge, San Francisco a mi te, Empire State Building, New York a mi te, Statue of Liberty, America ram a mite chu an ni a. Australia rama Sydney Opera House an tih pawh a tel a ni.
He khawvêlah hian thil siam mawi tak tak, hmuhnawm leh ropui tak tak a tam êm êm a. Khawvêl thilmak pasarih an sawi ṭhinte pawh hi kan ngaihluin kan ngaisâng êm êm a. Mahse hengte hi chu mihring din leh siam chauh an ni si a. Kan rilru hnehin kan ngaihtuahna te tithathovin kan mit in hmuhnawm tiin thlîr mah se kan hmuh loh hunah chuan kan hriatrengna-ah bâk a châm ngai lo a ni.
Hêng zawng aia ropui ber erawh chu kuta sak loh in, Pathianin min din sak hi a ni. Eng tikah nge chu in chhûng chu kan luh ve ang le! Angel vâr rualte nên khawpui mawi, hringmi ṭawngkamin a ropuizia a puanchhuah theih lohah chuan kan la kal dâwn a ni.
“Mita la hmuh ngai loh, benga la hriat ngai loh, Mihring rilrua lût ngai lo, amah hmangaihtute tâna Pathianin a buatsaihsak chu,” tih ziak ang khan. 1 KORINTH 2:9
LUKA 10:20 – Amaherawhchu, thlaraute in thu thu-a an awm avâng hian lâwm suh u, vâna in hming ziak a nih avângin lâwm zâwk rawh u,” a ti a.
