LUNGAWI TAKA THAWH

FILIPI 4:11
Ka tlâkchham thu sawi zawng ka ni lo ve; eng ang pawhin awm ila lungawi ka zir tawh si a.

Lungawi hmel hi a hmuhnawm avangin mahni hna ṭheuh hi lungawi taka kan thawh a pawimawh. Tirhkoh Paula pawh kha harsatna leh tlâkchhamna tam tak karah a lungawi zel ṭhin a ni.

Eizawnna kawngah leh kan chet velna hrang hrangah hotu emaw hruaitu emaw an awm ṭhin a. Heng miten min ho danah leh hlawh min pêk danahte hian lungawi loh mai a awl hle ṭhin. Kan hna hi a tê emaw a lian emaw, a hahthlak emaw, a hrehawm emaw pawh ni se, lungawi taka thawh hi hlimna min petu a ni zâwk. Thawk tam bawk si lo, hlawh lama lungawi loh chîng pawh hi kan tam sâwt hlê niin a lang. Kan thawh leh kan hlawh hi a inphu em? tih hi kan inzawh fo a ṭul ve ṭhin. Ṭhahnemngai taka thawktu chu hlawh hmu tlâk a ni reng bawk (I Tim.5:18). A titau zawnga thil kalpuite hi a mawi lo va, sulhnu mam tak nei tura lungawi taka kan eizawnnaah kan thawh ṭheuh hi Pathian duh dan a ni.