INTLÂNSIAKNA

— Chhantea (Oriela patea)
E. Lungdar

1 KORINTH 9:25-27
Intlânsiaknaa tel tûrte chu kawng engkimah an insûm ṭhîn, chawimawina lukhum chhe mai thei hmu tûrin an bei a, keini erawh chuan chawimawina lukhum chhe thei lo hmu tûrin kan bei a ni. Chutiang tak chuan kei pawh pan nei rânin ka tlân a, boruak mai hnek lovin keimah ka inhnek ṭhîn, ka taksa hi ka sawi zawi a, ka thunun a; chutilo chuan, mite hnêna Chanchin Ṭha hriltu ni siin kei hi hnâwlin ka awm hlauh dah ang e.

He khawvêl thil intlânsiaknaah chuan a hmasa berin eng kawngah pawh lâwmman pakhatna a dawng ṭhin. Chumi chang tûr chuan mitin mahni zâwn ṭheuhah theihtâwpa inbuatsaihin an awm ṭhin.

Ringtu nun kawnga intlânsiakah erawh chuan lâwmman pakhatna lâk kher ni tawh lovin, tiamchin lam panin tlân ngat ngat a, chumi thleng tûra ke pên tlauh tlauh a pawimawh ber. Chumi atân chuan kan thlarau tân taksa kan tih chhel a, mahni kan inhneh a ngai fo ṭhin. Pakhatna lâwmman lam nilovin tiamchin thlen kha kan tum ber tûr niin a lang a ni.

Chu miah erawh chuan tiamchin thlen hmaa paihthlâk a kan awm lohna turin chunglam duhdân anga kan rinna intlânsiakna kawngah hian ke kan pên tlauh tlauh hi ringtute tih tûr a ni.

Khawvêl thila intlânsiaknaah chuan infiam miten anmahni enkawltu tûr coach a hrang ṭheuhin an nei ṭhin a. Rinna kawnga intlânsiaknaa min enkawltu kan coach erawh a inang vek a. Chu chu Pathian a ni. Coach thuawih apiang dinchanna ram a ni e.