PATHIAN DAN ZAWH

ROM 13:10
Hmangaihnain vêngte a tikhawlo ngai lo va; chuvângin, hmangaihna hi Dân zawh famkimna a ni.

Tun hma kha chuan ringtute zîngah sakhuana kawnga inzirtîrna nghet tak an nei ṭhin a. Chûng zîngah chuan Chawlhkar Thianghlim (Holy Week) an nei ṭhin a ni.

Chu chawlhkârah chuan chhang leh tui chiah, ni ruk chhûng an ei in tûr a ni a. Chutiang chuan mi tute pawh chu an inbuatsaih ṭhin.

Vawi khat chu chu chawlhkâr an hman lai chuan Thawhlehni hian hmun hla tak aṭanga lo kal khualzin an awm a, chûng mite chuan an sakhaw hotute kawm an duh a. An Director inah chuan an thleng ta a.

An rawn kalna a hlat êm avangin an chau hle a, an hmêlah chuan hahdam an mamawh a, ei tur ṭha pêk an ngai hle tih a lang bawk a. Director chuan a khawngaih êm êm a, Chawlhkar Thianghlim, chhang leh tui chiah ei in theih lai a ni tih chu hre reng mah se an zanriah ei tûr chu a buatsaih sak ta a ni.

Mikhualte chuan zanriah puar takin an ei a, zan lam hun pawh hahdam takin an hmang ta a. Chutia an chawlhkâr thianghlim hman laia ei tûr dang mikhualte nêna an ei chu ṭhenawm khawvêngten an lo hria a. An khawtlâng sakhaw hruaitute hnênah chuan an sawisêl ta a.

Chûng mite chuan thuneitu hnênah thil awmzia an va sawi a, Father Director berin dân a bawhchhiat avâng chuan hrem an phût tlat a. Mahse Monastry chuan ti hian a lo chhâng, “Unaute u, Father Director chuan kan inrêlbâwlna dân te chu a bawhchhe tak meuh mai e, mahse ṭanpui ngai leh puih ngaite chunga a thiltih dân erawhah chuan Pathian dân a zawh zâwk a ni” tiin.

Khawtlâng inrêlbâwlna leh kan thlîrna ai hian Pathianin min kaihhruai a tumna hi huaisen taka kan zawh a va pawimawh tak êm.