THURÂWN

MATHAIA 12:37
I thu chuan thiam a chantîr ang che a, i thu vêk chuan thiam loh a chantîr bawk dâwn che asin,” a ti a.

Miropui tak chuan thurâwn ṭha tak tak a pe ṭhin a. Chung thurâwn ṭha tak tak zâwmtute chu thurâwn ṭha tak petu miropui tak aiin an ropui zâwk tiin an sawi ṭhin.

Thurâwn hi mi zawng zawngin kan mamawh. He khawvela thil zawng zawng hi experience tur chuan hringnun hi a tâwi êm êm a. Chuvangin kan thiam loh min zirtîr tûrte, thurâwn min petu tûrte chu hlawhtlinna tûrin emaw kawng dik zawhna tûrin kan mamawh a ni.

Tlangval pakhat Bank Cashier hi a awm a, Bank President châwl tawh thurâwn a lâk avanga mihlawhtling ni ta chu hetiang hian a chanchin an sawi.

Nikhat chu chu tlangval chuan a pu hnenah chuan va kalin inkawmna neih puiah a sâwm a.

“Ka pu, i hriat angin tûn aṭanga hun rei lo teah i President nihna chu i chawlhsan mai dâwn a. I ai ka awh chho dâwn a nih hmel a. Thurâwn ṭha tak min pêk tûr i neih ngei ka ring a. Khawngaihin chu thurâwn chu min hrilh theih chuan ka lâwm hle ang” a ti a.

President chuan, “Tlangval, ṭhu teh. Thumal pahnih chiah ka nei. ‘Duhthlanna dik’ tih hi” a ti a. Tlangval chuan, “Ka lâwm e, anih engtin nge miin duhthlanna dik a hman theih ang” a ti leh a. President chuan, “Thumal pakhat — Experience” a ti leh a. Tlangval chuan, “Engtin nge miin experience a neih ang” a ti leh a. President chuan, “Duhthlanna dik lo a neih tawh aṭangin” tiin a chhâng a.

Kan duhthlanna chuan kan nun a khalh a. Chuvangin duhthlangtu kan ni tih hi kan inhriat a pawimawh hle.