KALNA TUR HRE LO

SAM 25:4
Aw Lalpa, i kawngte chu min hriattîr la, I duhzâwng chu min zirtîr rawh.

Rêl-a an zinna-ah dân hremi lâr tak, Oliver Wendell Holmes chuan a Rêl ticket a hmu zo ta lo va. Conductor chuan Ticket a rawn check tawh si, a buai khawp mai a. A ipte leh bungraw kârah an zawng ṭhin a, a hmu thei bawk si lo. A mangang hle a ni.

Conductor chuan Oliver Wendell Holmes-a chu ticket a rawn dîl ve ta ngei a. An zawn leh ngial pawh chuan a hmu zo ngang si lo a. Conductor chuan, “Pu Oliver Wendell Holmes, a pawi lo ve. I ticket chu khawiah emaw a awm a ni ang e, i chhuk hmaa min pêk theih chuan a lawmawm ang. I hmu zo ngang lo a nih chuan i in i thlen hunah min rawn thawn mai dawn nia, kan ring tâwk che a lawm.” a ti a.

Holmes-a chuan, “Tlangval, ka harsatna min hriatthiam avângin ka lawm e. Mahse ka buaina ber chu ka ticket hmuh loh vâng ni lovin, ka kalna tûr ka hriat loh vâng a ni. Kha ticket-ah khân ka kalna tûr a inziak a, ka hmuh loh chuan ka kalna tûr ka thleng thei dawn si lo a ni” a ti.

He khawvêla mi tam tak hian kan kalna tûr kan hre lo. Kan duh dan danin nun kan hmang a, nawmsipbâwlin hun kan hmang ṭhin. Nun uluk nachâng hre lote hian an tâwpna tûr râpthlâk tak hi an hre lo a ni.

Ringtute chuan kan kalna tûr kan hrechiang tûr a ni a. Chumi thleng tûr chuan kan ticket neih uluk takin kan hmang tûr a ni.

Pathianin kan tâna hmun a buatsaih chu ringtute kalna tûr a ni a. Chu hmun ropui tak thleng tûr chuan kan kalna kawng kan hre tûr a ni.