A FA-AH VUAH

I JOHANA 3:1
Ngai teh u, Pain min hmangaihna chu a va nasa em! Pathian faahte’ min vuah tak hi.

Sunday School zirtîrtu hnêna hming ziak tûrin hmeichhe unau 2 hi an kal a. Zirtîrtu chuan an kum leh pianni a lo zâwt a. A lian zâwk chuan, “Kum 7 ve ve kan ni a, April ni 8-ah ka piang a, ka unaunu hi April 20-ah a piang thung” a ti a.

Zirtîrtu chuan, “Bawihte, i hresual a ni lo maw?” tiin a zâwt lêt a. Pakhat zâwk chuan, “Ka pu a dik alawm, tu emaw zâwk hi falâk (adopted) kan ni a” a ti a. Zirtîrtu chuan, “A ni maw, tu zâwk nge min hrilh thei em?” a ti a.

An unau chuan an inen a, an nui sak a. A lian zâwk chuan, “I zawhna hi hmânah pawh ka pa kan zâwt fo ṭhin a, mahse min chhân a hnêkin min hmangaih ve ve thu a sawi fo ṭhin a, kan pahnihah hian tu zâwk nge a falâk a hrethei tawh lo a ni” tiin an chhâng a.

Chu hmeichhe naupang pa hmangaihna chu a va nasa êm! Nimahsela, hei aia ropui zâwk hmangaihna chang kan ni lo em ni! Pathian fa-a vuah tlâk loh mai ni lo, nung tlâk lo kan nih lai pawha Fapa Isua Krista thisen avânga Fa tak tak “Pathian faahte” min vuah tâk hi!

Kan sualte avânga thi tûr kan ni a. Pathian thilthlâwn pêk hmangaihna erawh chu kan Lalpa Isua Krista zârah chatuan nunna a ni. Rom 6:23-ah chuan, “Sual man chu thihna a ni si a; Pathian thilthlawnpêk erawh chu, kan Lalpa Krista Isua zârah chuan, chatuana nunna a ni” a ti.

Nghîng ve ngai lo, ral thei lo, tâwp thei lo, ṭawih thei lo, bo ve ngai lo chu Pathian hmangaihna hi a ni.