A SAW RÂLTIANG TLÂNGAH

I PETERA 2:24
Sual lamahte thi tawhin felna lamah kan nun theih nân, amah ngeiin thingah khân a taksain kan sualte a phur a; amah vuakna vualte chuan tihdamin in awm ta a.

‘A saw râltiang tlângah, Kraws hlun tak chu a ding’ tih hla hi hla lâr tak, hnuk ti ulh thei khawpa hla ṭha a ni a. Kum 1913-a George Bennard phuah a ni a. Kum zabi 20 chhûnga Christian Hymn lâr berte zînga chhiar tel a ni nghe nghe.

Ni khat chu, Mlehigan aṭanga a rawngbâwl haw lam chu a ngaihtuahnaah Kraws thiltihtheihna nasa tak a lo chhuak a. Khati taka krawsin a nun a khawih danglam theih avâng leh kraws chu eng nge a nihna tak tak chu hriat châkin a thinlung a tuihâl ta a. Tirhkoh Paula’n Krista tawrhna ṭawmpuina nun a tih chu eng nge halehhuah a duh ta tlat mai a ni.

George Bennard-a chuan Kraws chu Kristiante chhinchhiahna leh sakhuana symbol mai a nih loh zia chu Thlarau Thianghlim puihna vangin a hrefiah zêl a. Chanchin Ṭha chhûngril tak tak, a laimu a nihzia te chu a thinlungah a chiang zual a. He hla a phuah chungchang hetiang hian a sawi:

‘Kum 1913 khan, Albion, Mlehigan-ah ka awm a. Chûng hun lai chuan min tiphûrtu leh min chawk tho em em mai thil hian min nang a. ‘The Old Rugged Cross’ tih hla hi ka ziak ta a. A tîr chuan a thlûk ka siam ve ngial a, mahse duhthu a sam lo. Ka mamawh chhânna tûra ka thinlunga dah sa ang mai hian he thu hi ka ziak har lo va. Pokagon, Mlehigan ah June ni 7, 1913 khan a vawi khat nan Special Meeting-ah pholan a ni a. Pokagon Kohhran pâwn lamah chuan Chicago Evangelistic Institute-ah târlan leh a ni a. Chumi hnuah khawvêl ram zau zâwka Kristiante hriat atân thehdarh a ni ta a ni.’

Chu kraws chu kan van kawng a ni a, thlah lova kan vawnin kan phurrit a lum bo va, Lalpa êng a lo lang a, kan zawh ta a, ‘Ka van in kawng kraws a ni’ tiin zâm lovin kan vânram nuam kawng kan zawh a lo ni.

Chu kraws chu pawmin ka vuan zêl ang,
Thlafam dairial ka chan hma loh chuan;
Thlah lovin ka vuan tlat zêl ang a,
Lallukhum hluah ka la chan ang.