MIDANGTE TÂN

1 JOHANA 3:18
Naute u, thu chauhvin i hmangaih suh ang u khai, lei chauhvin i hmangaih hek suh ang u, thiltih leh tihtakzetin ni zâwk rawh se.

Jewish thawnthu pakhat an sawi fo ṭhin hi a awm a. Hetiang hian an inhrilh ṭhin. Mi pakhat hian ṭhian pathum a nei a, pahnihte chu a kawmngeih deuh bîk a, pakhat erawh chu a thurûk zawng zawng pawh a hrilh ngai lêm lo a. Ṭhian naran ve mai atân a nei a ni.

Ni khat chu chupa chuan harsatna lian tak mai a nei a. A ṭhian pahnih kawmngeih bîk êm êm te chu a hrechhuak thuai a. Mahse a ṭhianpa pakhat chuan tih tûr dang pawimawh a lo neih avângin a ṭanpui hman ta lo a. Pakhat zâwk chuan “Ṭhianpa, khawi court-ah mah thu hriatpui turin ka ding ngai lo, khawngaihin min beisei lo mai rawh” a ti a. Chupa chu a beidawng êm êm a, ṭhianṭha-a a ngaihten an phatsan chu a rilru a na hlê a ni.

Tichuan, a ṭhian pakhat chu a hrechhuak ta a. A ṭhianpa, a ngainat loh ber chuan engtiklai pawha a ṭanpui theih thu leh Court hmaa a dinpui theih tûr thu a lo hrilh a. Chutiang chuan an pahnih chuan Court-ah an inlan ta a. Vânneihthlâk takin an buaina chu harsa lo takin an chingfel ta a ni.

Chupa chuan hetiang hian a sawi; mi tu pawhin ṭhian kan nei a, ṭhian ṭhenkhat chu sum duh avânga ṭhian mai an ni a, ṭhian ṭhenkhat erawh chu ṭanpuitu tak tak an lo ni. Kan mangan laia min hnaihtute hi ṭhian tak takte an lo ni, a ti.

Ṭhian tel lo chuan nun a kim lo, ṭhian tûr erawh kan thlan fîmkhur pawh a ngai hle a. Thil tam tak hi kan ṭhiante nêna kan zir leh kan thiam a ni. Amaherawhchu tu pawh ṭhianah nei ila, kawng dika kaihruaitu zâwk leh ṭanpuitu zâwk nih hi kan tum tlat tûr a ni. Lal Isua pawh misualte ṭhian tih a ni a. Amaherawhchu, ani chuan chûng misualte chu ṭhianah siamin a siamṭha ṭhin zâwk a ni.

THUFINGTE 24:26
Thu dik taka min chhâng ṭhîntu chu Ṭhian ṭha a ni.