HLIMNA MAMAWH

GALATIA 5:22-23
Thlarau rah zawng hmangaihna te, lâwmna te, remna te, dawhtheihna te, ngilneihna te, ṭhatna te, rinawmna te, nunnêmna te, insûm theihna te a ni. Chutiang kalh zâwng Dân a awm lo ve.

Tute pawhin hlim taka awm kan duh a, mahse tute pawh hian hlim taka awm har kan ti ṭheuh lawi si a. Hlimna kan duh a, kan zawng a, mahse chu chu mi tlêmte chauhin an nei si.

Sikh-pa pakhat pawh hian hlimna a zawng a. Khawchhak ram mifing hnênah chuan a han kal vang vang a, thu pawimawh êm êm, hlimna neih theih dân leh a thlahte thlahte leh zêl hnênah pawh a hnutchhiah tûr a hrilh ta a.

Khawchhak rama mifing chuan, “Pa ber a thi a, a fapa a thi a, a tupa a thi leh ṭhin” tih thu a hrilh a. Sikh-pa, pa hausa tak mai tân chuan chu thu chu a ho hlê ni tûr a ni, a thin a rim êm êm a, “Chu chu hlimna, chhungkaw inthlahchhâwng zêl tûrin kan inchhawm tur chu maw!?” a ti a.

Mifing chuan, “I tupa kha nang aiin thi hmasa se, i fapa kha nang aiin thi hmasa bawk se, i thinlung chu den sawm angin a keh chhe vek ang. Nun hian awmzia reng nei lovin i inhre bawk ang. In chhûngkua chu a upa pa aṭangin inthihsan ṭhin zêl ula, chûng chuan lungngaihna atâ min tidam ṭhin” a ti a.

Philospher-te chuan, “Hlimna chu mite an hlim a ni tih hriattîr hi a ni lo a. Lungngaihna leh ṭahni a tawn chiahin a tawn loh lai kha a hlimlai a ni tih hriatchhuah tîr hi a ni” an ti.

Ringtute hlimna hi eng nge? Hlimna kan tih hi engti’angin nge kan hriatthiam. Harsatna tâwk miah lova chhûngkuaa awm te, kan duh leh mamawh apiang neih te hi em ni hlimna ni ang! Chu chuan min tihlim teh reng ang le! Mahse khawvêl hlimna ni lo thlarau rah hlimna kan neih si loh chuan chûng anga harsatna tâwk lo nih ringawt chu a tâwk lo a ni.

2 KORINTH 8:2
Hrehawm nasa taka fiah an ni chungin an lâwm ta êm êm a, an pachhe hle chung pawhin an thilphal êm êm a ni.