RINNA

2 TIMOTHEA 1:12
Chu vâng chuan a ni hêng thil pawh hi ka tuar ni; nimahsela, ka zak lo ve; ka rina chu ka hria, a hnêna ka kawltîr chu, chumi ni atân chuan a vawng ṭha thei tih dik takin ka hre bawk a.

Kum zabi 20-na laihawl vêl lai khan ‘Tightrope walker’ an tih hi a awm a. Hrui sei tak zawhtu a ni ber âwm e, a hming chu Blondin-a a ni.

Blondin-a chuan inches 2 thîr hrui sei tak hi khawvêla tuikhawh thla mawi bera an sawi Niagara Falls tan tlangin a thlung a, mite hnênah chuan, “Mihring anga rit ka dârah hian ka dah ang a, ka zawh chhuah theih in ring em?” a ti a.

Mipuite chu an haw haw dur dur mai a. Blondin-a chuan KG 363-a rit ip chhûnga lei dah khah tlat chu a pû a, a zawh ta a. A zawh chhuak ta mai a. Mipui chuan hmuhnawm an ti a, mak an ti a, a ṭhen phei chuan an hlau a, an en ngam lo hial a ni.

Blondin-a chu ropui a inti êm êm a, mite hnênah chuan, “Mihring ka kokichhuan ang a, he tuikhawhthla hlauhawm tak hi ka zawh chhuah theih in ring tak tak em?” tiin a zâwt leh a. Mipui chu an ngawi ta ṭhuap mai a, mite chuan hmuh leh an châk a, mahse tumah an inpe ngam bawk si lo a ni.

A hnu-ah chuan tûn hma-a Blondin-a thawhpui tawh, a manager chu a rawn pên chhuak ta a. Tichuan, zawh tûrin an inbuatsaih a, Blondin-a chuan a manager hnênah chuan, “Nangmah in ring suh ang che, kei min ring ang che. Kan zawh laiin hawikîr a, lêt leh i duh mai thei, mahse a theih loh ang. I ngaihtuahna i rin chuan kan pahnihin kan tla ang tih hria la, keimah chiah min ring ang che.” a ti a. Tichuan, an zawh ta a, an zawh chhuak ta a, mipui tam takten an thlir ṭhup mai a ni.

Hun harsa leh hlauhawm tak kan tawh chângin Lal Isuan amah ring tlat tûrin min duh a ni. Amah chu kan thlîr tlat tûr a ni a, kan rinna hi a nghîng dâwn lo tih hre chungin amah beisei tlat tûr a ni.

Nangmah in ring suh ang che, kei min ring ang che.