MIHRING FELNA TLING LO

1 KORINTH 2:4-5
Tin, in rinna chu mihring finnaa innghat lovin, Pathian thiltihtheihnaa innghata a awm theih zâwkna tûrin, ka ṭawngka chhuak leh ka thuhrilte chu thu finga thlêmna thuin a ni lo va, Thlarau leh thiltihtheihna hriattîrin a nih zâwk kha.

Chinese mi pakhat hi a piangthar a. A pianthar hma chuan ṭha inti êm êm mai, fel inti bawk si, midangte aia fing inti bawk si a ni. Mahse an khuaa missionary rawn kalte avângin a chungah Pathian hnathawh a lo lang a, a pianthar hnu chuan ti hian a sawi:

“Engtin nge miin a felna leh ṭhatna ringawtah a innghah theih ang a, chu chuan engtin nge chhandam a nih theih ang. Mahni hlim (shadow) hnuaia awm daih tum ang a ni. Kan hlim hnuaiah awm kan tum chuan leiah kan bawk ang a, kan bawhna hnuaiah chuan hlim a lo awm leh anih chuan lei chhûngah kan luh a ngai daih ang. Mahse miin lungpui lian tak hlim (shadow) hnuaia a awm chuan chu lungpui chuan a hliahkhuh ang a, nisa leh ruah lakah pawh vênin a awm ang. Thiltihtheihna nei lo mihringte hian min vêngtu leh hualhimtu kan mamawh hlê a lo ni. Chutih lai chuan Lal Isua erawh chuan ni leh ruah chu sawi loh, kan chhûngril ber pawh sual leh ramhuai lakah min lo veng thei a ni,” a ti.

Mihringte hian he khawvêla finna leh thiamna sâng ber nei mah ila, thil zawng zawngah kan taksa leh thlarau a vêng zo lo a ni. Kan in leh lo ṭha pui pui te, kan hausakna tinrêngte hi chhuang mah ila, chûngte chuan thihna ata min chhan thei lo va, kan nunna min pawh seisak thei bawk hek lo.

A pawimawh ber chu Lal Isua a ni. Kan thiamna leh finna te, kan neih thil zawng zawngte Lal Isua tâna hmang ngai loten hmang tawh ila, a hmang tawhte pawhin tûn aia nasa zâwkin min petu leh mal min sâwmtu ropuina tûr atân i hlân zêl ang u.

1 KORINTH 2:13
Mihring finna an inzirtîr ṭhin chu hmang lovin, Thlarau zirtîrna hmangin thu kan sawi zâwk a, thlarau mite hnênah thlarau lam thil kan sawi fiah ṭhîn.