LALPA ṬIH – DAM REINA

THUFINGTE 10:27
Lalpa ṭihna chuan dam chhûng ni a tisei a; Nimahsela, mi suaksual kumte chu tihtawi a ni ang.

Kan Bible hian dam rei hi a ngaisang hle a. Kum lama upate chunga kan rilru put dan tûr chenin a sawi. “Lua kelsam ṭote hmaah chuan i ding zêl ṭhin tûr a ni a, tar hmêl chu i zah tûr a ni,” (Lev. 19:32) tiin.

Dam hi a hlu a, chu aia hlu leh zual chu dam rei a ni. Pathian ṭih mi chuan a taksa tâna ṭha lo tûr – Bible duh loh zâwng thil bawlhhlawh lakah a inthiar fihlim a, chu chuan a taksaah hriselna a thlen a, a lo dam rei phah nge nge ṭhin. Tin, Lalpa ṭihtute chuan dik tak leh rinawm takin thil an ti a, nun dân thianghlimin an nung a; chu chuan an taksa, rilru leh thlarau a ti hahdam ṭhin a ni.

Dam rei lo kan tih tam tak hi Pathian ṭih lo mi, an taksa an ta emaw tia duh ang ang tih nâna hmang mai mai ho an ni fo. Lalpa ṭihtute chuan an taksa hi Pathian Thlarau chênna a nih an hria a, an tih bawlhhlawh duh loh avangin a dam pawh an dam rei nge nge ṭhîn.