LUNGNGAIHNA

2 KORINTH 7:10
Pathian duhzâwng anga lungngaihna hian chhandamna tûra simna a thlen a, inchhîrawm lo tak a ni. Mihring taka lungngaihna erawh chuan thihna a thlen ṭhîn a ni.

Vawi khat chu Setana hian sualna hmanruate chu hralh a tum a. A hote chuan a hmanraw hrang hrangte chu a rawn la chhuak a. A man an târ thliah thluah a. Chung zîngah chuan rilru chhiatna te, huatna te, îtsîkna te, chapona te, duhawmna te pawh a tel a ni.

An han rem an han rem hnu chuan a sîrah chuan hmanraw hlui tak, sawi bim bem, puanchhia-a tuam hi a awm ve a. Mahse thil dangte ai chuan a man a sâng daih a. A hote chuan Setana hnênah chuan eng nge a nih an zâwt a, a dangte aia a man a to chhante an zâwt bawk a.

Setana chuan, “Lunghnualna (Discouragement) a nih kha,” a ti a. A hote chuan, “A man a va sâng bîk ve?” an ti a.

Setana chuan, “Lunghnualna te, lungngaihna te hi ka hmanraw ṭangkai berte an ni. Lunghnualna leh lungngaihna hmang chuan mihringte thinlungah, an chhia leh ṭha hriatnaah ka lût thei tlat a ni. Hmanraw dangte ai chuan awlsam takin ka lût thei a ni. An lungngaih lai leh an lunghnual laia an chhia leh ṭha hriatnaa ka luh fuh tawh chuan ka duh ang thalin ka sâwngbawl thei tawh a. Ka hman rim êm avangin a dangte ai khan a hlui hmêl a nih kha,” tiin a chhâng a.

Lungngaihna avangin Pathianah lawmthu kan sawi thei lo fo ṭhin a, Pathian kan fak thei lo ṭhin. Chu chu Setana lâwmna ber a ni. Ṭahna ruamah pawh Lalpaah lâwm fo tûrin Paul-a chuan min hrilh kha.

FILIPI 4:4
Lalpaah chuan lâwm fo rawh u, ka sawi nawn leh ṭhîn ang, lâwm rawh u.