LEHKHABU ṬHA CHHIAR

THUFINGTE 8:10
Ka zirtîrnate dawng rawh u, tangkarua te ni lovin; Tin, finna chu rangkachak duhawm mi ai pawhin.

Lehkhabu ṭha lovin a chhe zâwnga nasa taka a thawk thei ang bawkin lehkhabu ṭha hian a chhiartuah nasa takin hna a thawk thei a. Mi chak lo a tichak thei a, mi dawihzep a tihuaisen thei a, mi beidawng hnênah beiseina thar a siam thei a, mi mâwl a tifing a, mipuitling lo puitlingah a siam thei a, mi ho tak pawh mi ropui takah a chhuah thei ṭhin.

Bible hi lehkhabu zawng zawngah chhiar atâna ṭha ber a ni a. Mihring nun kawnga zawhna kan chhân thiam loh zawng zawng pawh min chhânsak thei vek. Bible bâkah kan rinna tichak thei leh rawngbâwlna kawnga min pui thei tûr tam tak a awm a, hêngte hi chhiar ṭhin a ṭha. John Wesley-a chuan, “Lehkhabu chhiar ngai lo rawngbâwltu chu bâng mai rawh se,” a ti hial a ni. Hmuhnawm dang a tam tâk avang tak te hian lehkhabu ṭha chhiar lamah hian ringtuten ṭan kan lâk a ṭûl hlê mai.