JOBA FIAHNA

JOBA 1:20-21
Tichuan, Joba chu a tho va, a puan a pawt thlêr a, a lu a ziat kawlh a, leiah a tlu a, Pathian a bia a; “Ka nu pum ata saruakin ka lo chhuak a, saruak vêkin ka kir leh dâwn a nih hi. Lalpan a pe a, Lalpan a la leh ta a; Lalpa hming chu fakin awm rawh se,” a ti a.

Joba hi Bible-a fiahna tâwk hautak ber leh nasa ber a ni hial ang. Amah hi khaw chhak fate zîngah chuan mi ropui ber a ni a – beram 7,000; sanghâwngsei 3,000; bawngpa tuak 500; sabengtung 500 leh chhiahhlawh tam tak a nei a. Fapa 7 leh fanu 3 a nei bawk a. Hêng zawng zawng hi a chân vek hnuah amah pawhin a kephah hnuai aṭanga a lu thlengin pânchhia a vei a. Hetiang khawpa fiahna hautak hi a paltlang a, a tâwpah Pathianin a hmaa a neih lêt hnih a pe leh ta vek a ni.

Joba nun aṭanga kan zir tûr chu fiahna paltlang tûr chuan inngaihtlâwm te, dawhtheih te leh tuar chhel te a ṭûl tih te leh fiahna paltlangtu chu Pathianin a chawimawi a, malsawmna tam takin a vûr lêt leh ṭhin tih hi a ni.