DÂWT SAWI

EPHESI 4:25
Chutichuan, dâwt sawi bânin, mahni ṭhenawm hnênah thu dik tak sawi ṭheuh rawh u; inpêng tawn ṭheuh kan ni si a.

Kan Bible-in a huat leh a sawi tam êm êm chu dâwt sawi chungchâng hi a ni a. Thupuan-ah pawh dâwt sawi hmangte chu ui te, dawithiam te, inngaih chîng te, tualthat te, milem bia te nên hremhmun kal tûr an nih thu min hrilh (Thup.22:15).

Kan eizawnna kawnga kan duhâm avâng te, mahni sa him kan duhna avâng te, mahni hmâ kan sial hrim hrim avânga dâwt kan sawi a tam hlê âwm e. A tlângpui thuin zu leh ruihhlo ti ṭhin hote leh rûk hmanghote hian dâwt sawi an chîng zual. Dâwt sawi thiam zâwngin Setana’n a tifing ve a, hniak phawi hauh lovin dâwt an sawi zar zar thei a. ‘I sawi leh tûr pawh dâwt bawk’ tih mai awm chî kan ramah hian an pung tual tual emaw tih tûr a ni. Ṭhenawmte chu thu hran, hringtu nu leh pa ngei pawh bum theih chhûng chu bum duh an tam hle. Kan Bible-in min duh angin dâwt sawi hi i bânsan tawh ang u.