ENGKIM KA TI THEI

PHILIPPI 4:12-13
Tlâwm taka awm dân ka thiam a, hausaa awm dân pawh ka thiam bawk a; thil tinrêngah leh thil zawng zawngah tlai leh rilṭâma awm dân, hausa leh tlachhama awm dân thurûk chu ka hre chhuak tawh. Mi tichaktuah chuan engkim ka ti thei a ni.

Evander Holyfield-an Mike Tyson-a a beih dâwn khân a innghahna chu, “Mi tichaktuah chuan engkim ka ti thei,” tih kha a ni a. A chhuan Lalpa zârah chuan hnehna lallukhum a chang ta a ni.

Tirhkoh Paulan ‘engkim ka ti thei’ a tih hian tharuma mi va hneh theihna lam a sawiin a lang lo. A hun leh a hmun ang zêla awm dân te leh a dinhmun chhiat leh ṭhat dân ang zêla awm dân a thiamna kha a sawi niin a rinawm. Krista avanga retheih hi a har ang bawkin, Krista avanga nawmsak thiam hi a harsa a. Krista avanga mi hmuhsit nih peih a harsa angin, Krista zâra mi duhsak leh ngaih ropui nih thiam a har bawk. Heng zawng zawng hi Paula chuan khenbeh nun neiin a lo zir chhuak tawh a. Engkim ti thei dinhmunah a lo ding tawh a ni.