MIDANGTE NGAIHSAK

1 JOHANA 3:18
Fate u, ṭawngka leh thu chauhvin i hmangaih suh ang u, thiltih leh tihtakzetin ni zâwk rawh se.

Mother Teresa-i khân a thil tawn zînga ropui a tih êm êm chu hetiang hian a sawi:

“Zan khat chu mi pakhat hi ka hnênah a rawn kal a, ‘Chhungkaw pakhat, fa 8 nei khawngaihthlâk êm êm mai an awm a, ni tam tak chaw an ei tawh lo’ tih thu min rawn hrilh a. In-a ka chaw neih ang ang chu ka keng a, an in lam pan chuan ka kal ta a. Ka thlen chuan an hmêl aṭangin naupangho chu an ril a ṭam hlê a ni tih a hriat theih a. Lungngaihna leh hlim lohna êm êm an nei lo, mahse an ril a ṭâm tawngkhawng a ni tih chu an awm dân aṭangin ka hmu a. Ka chaw ken chu nu ber hnênah ka pe a, hmun hnih-ah a ṭhen a, hmun khat zâwk keng chuan a chhuak ta daih a, a rawn lêt leh hnu chuan khawiah nge a kal ka zâwt a, ani chuan, ‘kan ṭhenawmte inah ka kal, anni pawh an ril a ṭâm a’ tiin mâwl takin min chhâng mai a.

Hemi chungchangah chuan mak tihna êm êm ka nei hran lo, a chhan chu miretheite hi an thilphal êm êm ṭhin a ni. Mak ka tih zâwka chu an rilṭam ve a ni tih engtin nge a hriatsak theih. Thil rêng rêng hi a nih danah chuan harsatna kan tawh hian mahni hi kan indah lian êm êm ṭhin a, midangte tân hun leh tha kan pe thei ngai lo a. Mahse he nu hian khatianga a tithei kha mak ka ti a, a ropui ka ti hlê a ni.” a ti.

Mahni hmâ kan sial em? Midangte tân tha leh zung kan pe em? Pathian thu chuan, ‘Nangmah i inhmangaih angin i vêngte hmangaih rawh’ a ti (MATHAIA 22:39).

MATHAIA 25:40
Lalber chuan, ‘Thu dik ka hrilh a che u, hêng ka unau tê berte zînga pakhat chunga in tih chu, ka chunga ti in ni,’ tiin a la chhâng ang.