KHAWVEL TUIPUI ZAU
LUKA 21:34-35
Tichuan, nawmsak bâwl te, zu ruih te, ni tin khawsak engtona te in rilrua a khah lutuk loh nân fîmkhur rawh u. Thanga âwk phut ang maiin a rawn nang dah ang che u. Lei pum pui chunga chêngte chungah chutiangin a lo thleng dâwn si a.
Lawng hi tuia awm tûra siam a ni a. Mahse lawng chhûngah tui a luh erawh chuan a ṭha lo va, a hlauhawm bawk a ni. Mihringte hi kan bawchhiatna avangin lei ânchhedawnga awm tûra tih kan ni a, mahse he lei ânchhedawng leh bawlhhlawh tak hi kan thinlungah a luh erawh chuan chatuan boralna tûr a ni.
He khawvêla chêng reng chung hian nun himna hmun thleng tûrin kan fimkhur a ngai hle thung a ni.
Khawvêlin a thinlungah hmun a luah vaih erawh chuan thihna leh chhiatna a thleng ang. Chuvangin Kristian chuan engtiklai pawhin a thinlung chu chênna in atân buatsaihtu Pathian tân a zuah reng ṭhin tûr a ni a, tichuan he khawvêlah leh khawvêl lo la awm tûrah pawh muang tak leh him takin a châwl ang.
Tui tel lo chuan a nun theih loh tih kan hre ṭheuh a. Mahse tuia kan pil erawh chuan kan thaw thei a, kan thi mai dâwn a ni. Chuvangin tui chu kan hman dâwn leh kan in dâwn apiangin a chhûnga kan tla lût tûr lakah kan inveng tûr a ni.
Chutiang chiah chuan khawvêl thilte pawh hi kan mamawh atâna hman tûr a ni a. A tel lo chuan nun a harsa a ni mai lo a, a tel lova nun theih loh châng a awm a ni.
Hetiang chiah hian Pathian pawhin khawvêl hi mihringte hman atân a siam a, mahse mihringte hi khawvêlah kan tla lût tûr a ni lo. Kan tlâk luh hun hunah ṭawngṭaina thaw a tâwp ang a, inkhâwm tûrin kan ke a bai anga kan boral mai dâwn a ni. Chuvangin he khawvêlah hian fimkhur takin kan nun kan hmang tûr a ni a. Khawvel tuipui zau taka pil hi a hlauhawm takzet a ni.
LUKA 21:36
Chûng thil lo thleng tûrte tuar chhuaka, Mihring Fapa hmaa in din theih nân eng lai pawhin ngaihvenin ṭawngṭai rawh u,” a ti a.
