HIMNA

2 CHRONICLE 16:9
Lalpa chuan amah ring tlattute chu ṭanpui tûrin khawvêl pum puiah a mit a lên ruai ruai ṭhîn a ni. Tûn aṭang chuan do tûr i nei reng ang. Âtthlâk takin thil i ti a nih hi,” a ti a.

School/College/University ṭha tak tak a awm a, chûng zirna in te chuan dân ṭha tak neiin naupang ṭhatna tûr leh school ṭhatna tûrin kalphung nghet an nei ṭhin a. Thuawih taka school dân zawm ṭhin naupang chu a lo puitling a, hlawhtlinna nên miropui tak a lo ni ṭhin.

Traffic dân zawm hi thil pawimawh tak a ni a. Khawthlang lam ramah chuan motor-a chuang reng rengten ṭhutna-a inhrênna (Seat-belt) awm chu an hrêng ngei ngei ṭhin a, chu chu an dân a ni a, an zâwm ṭha hle. An chetsual palh pawhin chu chuan a veng fo ṭhin. India ramah pawh he dân hi hman a ni tawh a, mahse a tam zâwkin kan la zâwm thei meuh lo. Dân zawm hi kan himna tûr a ni si a.

Mizoram-ah phei chuan Traffic Police kan nei ṭha êm êm a, dân pawh kan nei ṭha a, mipuite pawhin kan zâwm tlângpui a, zâwm lo erawh an awm zeuh zeuh tih chauh a ni. Dân zâwmte chu zâwm lote aiin accident lakah an fihlim nge nge ṭhin bawk.

Dâktawr-te hian damlo an tidam a ni mai lo a, hriselna nei tûrin nasa takin mipuite an ṭanpui a, ei leh in dân tûr te, exercise lâk dân tûr te thlengin min hrilh ṭhin a ni.

Khawvêlah hian dân zawm hi a har em em a, mi tam tak chu an luhlul avang te, an fimkhur loh avang te, midangte an ngaih pawimawh loh vang leh an sual hrim hrim vang pawh a ni ang.

Hetiang chiah hian Pathian thu-ah pawh kan awmdân tûra Bible-a min hrilh ang te, kan tih tûr leh tih loh tûr te hi zawm tûr a ni a. Khawvêlin kan ṭhatna tûra ruahmanna a siam kan zawm loh avanga thihna te, harsatna te kan tawh chuan Pathian thuawih loh avanga harsatna te, manganna te, buaina te kan tawh tûr hi a râpthlâk dawn hle a ni.

SAM 34:7
Vântirhkohte chuan Lalpa ṭihtute chu An hual tlat a, an humhim ṭhîn.