KHAWVEL MAMAWH

MARKA 16:15
Tin, an hnênah, “Khawvêl zawng zawngah kal ula, thil siam zawng zawng hnênah chuan Chanchin Ṭha hi hril rawh u.

Khawvêla mihring lo piangte hi kan hmêl a in an loh ang angin kan mamawh leh duhzâwng pawh a in ang lo nuaih mai a. Kan zavaia kan mamawh tlân vek chu Chanchin Ṭha hi a ni. D.L. Moody-a chuan, “Ka thil hriatah chuan Chanchin Ṭha hi a hlu ber a, chuvang chuan ka hril lo thei lo a ni,” a ti a. Thil hlu dang tam tak khawvêlah hian awm mah se chatuan daih pakhat mah a awm lo, Chanchin Ṭha chauh hi chatuan daih a ni.

Khawvêl hnêna thil hlu ber pe chhuak thei dinhmuna kan ding hi chanvo ropui tak a ni. Vâna Vântirhkohten an chan phak loh mawhphurhna hlu leh ropui ber a ni. Mi fing leh remhria te, mi thiam leh hausate kovah chauh dah lo va, Chanchin Ṭha kan hril ve a phal hi i lâwm ang u.

Lâwm taka a hmêl duhawm ka hmuh theih nân,
Ka inpe e boralte zawng tûrin.

kan ti ve thei dawn em le?