KRAWS LERA ISUA THUSAWI 4-NA

MATTHAIA 27:45-46
Tin, chawfâk hun achin behliang mun hun thlengin khawvêl a lo thim ta vek a. Tin, behliang mun hun lai vêl chuan Isua chu aw ring takin, “Eloi, eloi, lama sabakthani?” tiin a au chhuak a.

“Eloi, Eloi, lama sabakthani” tih hi Aramaik ṭawng a ni. Mizo ṭawng chuan, ‘Ka Pathian, ka Pathian, engah nge mi kalsan?’ tihna a ni. Davida mangang auvin hetiang hian a lo chham chhuak tawh (Sam 22:1).

Pathian kalsan kan hlawh ai Isua hian a Pa kalsan a hlawh a ni kan ti thei ang. Tin, sual phura hrem a tawhna chuan Pa hnên aṭangin a tihrang pawh a ni thei ang. Harsatna khur thûk taka mi a tlûk luh chuan Pathianin kalsan ta anga inngaihna pawh an nei ṭhin. Chutiang dinhmunah chuan a ding a ni ang. Sual fate tâna a thawh nasatzia a au hla hian a tichiang hle mai! Hetiang taka kan tâna tuartu tân hian kan tuar ngam ve ang em le?