DIABOLA DODÂL

JAKOBA 4:7
Chutichuan, Pathian thu thuin awm rawh u; amaherawhchu, Diabola dodâl rawh u; tichuan, a tlân bosan ang che u.

Ni tin zan tinin Diabola dodâl hi kan tih tûr a ni. Ringtute hian entawn tûr Lal Isua kan nei a, ni sawmli leh zan sawmli zet thlalêra eng mah ei lova a awm khân kawng thumin Diabolan a thlêm a; mahse, a thlêm thlu zo lo a nih kha.

Tûnlai khawvêlah hian Diabola hi mi mal nunah leh Kristian chhûngkuaah te; kan eizawnna lam thleng pawhin a ngampa ta lutuk deuh chuan a lang ta! Lal Isua anga Diabola hi kan dodâl ve ngam a ngai, chu chu min tlân bosanna tûr a ni tiin Jakoban min hrilh a ni. Paula chuan Diabola kan do zawhna tûrin Pathian râlthuam famkima inthuam tûrin min ti a. Kan kâwng thutaka hrêng a, felna âwmphaw ha a, remna Chanchin Ṭha inbuatsaihna chu kan kea buna ding tûrin min chah a ni. Kan thinlungah hmun kian lovin, Lal Isua tih dân angin “Setan, kal bo daih rawh,” tih hi kan dodâl ve dân tûr pawimawh tak a ni. Setana duh zâwng keimahniah tihpuitlin a nih loh nân i hauin i hnar ṭhin ang u.