ZAIA PATHIAN FAK

SAM 30:4
Aw, a mi thianghlimte u, Lalpa fakin zai ula, A hming thianghlim chu fak rawh u.

Zaipâwl hruaitu thiam tak leh mi ngaihsân tak pakhat hi a awm a. Inkhâwmpuia sak tûr thiam takin an zir a. An rem hun a thlen dâwn hnaihah chuan an hruaitu chu a thi thut mai a, a thlarau chu vânramah a kal a. A hote an zai huna vân aṭanga lo ngaihthlâk chu Pathian hnênah a dîl a, phalsak a ni a. An zâi hun a lo thlen chuan thiam takin an zâi a; mahse, pathum aw chauh a hre thei a. Pathian hnênah a chhan a zâwt a; Pathian chuan, “Vânram aṭang hi chuan ka thu zâwma awihtu, thlarau leh tihtakzeta zâite aw chauh kan hre thei alawm. Mite hriata mawi leh fak hlawh beiseiin tam tak an zâi a, mite fak hlawh tam tak hian Vânram hi a nghawr pha lo a ni,” tiin a chhâng a ni, an ti.

Kan zâi hian a behbâwm leh chhepchher lam aiin chung lamin an hriat theih leh theih loh lam ngai pawimawh hmasa ila. Vânram nghawr phâk, thlarau hriak thih zaia Pathian fak i tum ṭhin ang u.