ṬAWNGṬAINA CHI HRANG

LUKA 18:11
Pharisai chu a ding a, amah chauhvin heti hian a ṭawngṭai a: ‘Pathian, mi dang anga hlêprute, fel lote, uirête ka nih loh avâng leh he chhiahkhawntu ang pawh hi ka nih loh avângin i chungah ka lâwm e.

Juda-te chu ni tin vawi thum (zîng dâr 9, chhûn dâr 12, tlâi dâr 3) an ṭawngṭai ṭhîn. Pharisai leh chhiahkhawntu pawh ṭawngṭai tûrin an kal ve ve a. Pharisai chuan sâwma pakhatin a phût bâk thlenga a pêk ṭhin chu chhuangin Pathian hnênah lâwm thu a sawi a. Chhiahkhawntu erawh chuan a khawngaih dîlin a ṭawngṭai a. Thiam chang zâwk a ni.

Mahni aia mi dang ṭha zâwka ruat tûr (Phil 2:3) kan nih laiin Pharisai hian Pathian ngaihdamna leh zahngaihna a mamawh lam a ngaihtuah lo. A thil tih ṭhat chhuangin lâwm thu a sawi a ni. Mi dang hmangaih lovin a en hniam (Mt 7:1-2) zâwk a ni. Keini pawh LALPA hmaah inphah hniam chungin i ṭawngṭai ṭhîn ang u.

Inngâitlâwmte erawh chawimawiin an awm ang.