BEISEINA PETU

TIRHKOHTE 27:34,36
Chuvângin, chaw ei atân ka tîr chiam a che u; in damna tûr a nih hi; in zîngah tu ma samzai pakhat mah a boral lo vang,” a ti a. Tichuan, anni pawh thlamuang takin an awm a, chaw an ei ve ta a.

Kaisara hnêna thiam thu sawi tûra Paula Roma a kal hun hi zin hun him lo, thlasik, bâr thla a ni tawh rêng a. Paulan chhiatna thleng tûr pawh a sawi a (Tirh 27:9-11). An kal lui a, harsatna an tâwk ta a ni. Lawnga mi 276 lai chuangte chuan dam khawchhuah an inbeisei lo. Paula chuan Pathianin an zaa nun a chhanhim tûr thu a sawi a (Tirh 27:22-26). Lawng mite chuan lawng tlânsan an tum chu a khap hial a ni.

Khawvêl hausakna, sum leh pai, sânna leh thiltihtheihnate hian tâwp chin an nei, beisei a bo tawh chuan a manganthlâk. I kiangah nun beidawng an awm em? Beiseina thar pe theitu Isua kawhhmuh rawh le!

Nunna hrui thlung r’u, chak leh rang takin,
Engah nge i muan, i awm muan mai le?
En teh, an pil mêk, aw hmanhmawh langin.
Nunna lawng nên chuanin lo kal thuai ang che.

Beiseina thar petu Isua hnêna mite hruai hi ringtu mawhphurhna a ni.