THUDIK A TLO

TIRHKOHTE 28:3,5
Paula chuan thing têl khat a fawm a, meiah a tuah a, a sat avângin rûl a lo chhuak a, a kutah a chû a, a bet ta reng a. Nimahsela, ani chuan rannung chu meiah a thing thla a, eng mah a ti lo va.

Paula leh a lawng chuanpuite chu thlasik vawh lai takin Meliti thliarkârah an kâi a, mei an chhêm a, rûl a lo chhuak a, Paula chu a chû a, a bet ta reng a. Thâwklehkhata thia a tlûk nghal an ring a; mahse engtin mah a awm lo tih an hmuh chuan Pathianah an ngai a. Lustra khuaah piantirh ata kebai a tidam a, an pathian ‘Merkuria’ tiin, sebâwngpate talh a biak an tum a. Judate an lo kal hnuah lungin an dêng a, thia an rin avângin khua ata an hnûk chhuak hial a ni (Tirh. 14:8-19). Mihring rilru inthlâk danglam chakzia a tilang.

Thudik leh saihlum a ngêt ngai lo tih a ni a, dik lo taka puh i nih pawhin zâm suh, lungngai suh, Lalpan a hria.

Hrehawmna lo thleng mah sela,
Buainate lo awm mah sela;
Ka lâwm zêl ang, hei hi hriain,
Lalpan mi ngaihtuah ṭhin.

Thudik chuan lan chhuah hun a nei ṭhin.