I NGAIHTUAH ANG U

ISAIA 1:18
Lalpa chuan, “Hawh teh u, i ngaihtuah tlâng teh ang u! In sualte chu senlâr angin awm tawh mah sela, vûr angin a vâr ang; senduk angin sen tawh mah sela, berâm hmul angin a awm ang.

Pâwn lama kan sakhaw mina hian Pathian a tilungawi lo va. Pathian duh zâwng inthâwina chu thlarau lungchhia a ni (Sam 51:17). Inthâwina aiin thu awih a ṭha zâwk (1 Sam 15:22). Pâwn lam lan dân ni lovin thinlung a pawimawh zâwk (1 Sam 16:7). Mawi tak leh zei taka kan tih lai hian chhûngril a en zâwk a ni. ‘I ngaihtuah tlâng ang u,’ Lalpan a ti.

Kan sual senlâr anga sen tawh pawh a thu âwiha a hnên kan pan chuan vûr leh berâm hmul angin a lo vâr leh dâwn a ni. Sual ser kan nunpui kumkhua a ṭûl lo, Isuan a tifai thei. A nghawng chhia Zoramin kan tuar a, chhûngkaw tam takin harsatna kan tâwk mêk. Mi tinin ṭan kan lâk ṭheuh a ṭûl.

Hawh teh u, i ngaihtuah tlâng dâwn teh ang u le,
In sualte chu dum mah se;
Vûr aiin a vâr ang, a lo vâr leh ang,
Berâmno thisen avâng chuan.

Hawh u, Lalpa chakna ringin hma i la ang u.