A NI LEH DÂR HRIAT LOH

MARKA 13:32-33
Nimahsela, chumi ni leh a dâr thu chu Pa chauh lo chuan tu mân, vâna vântirhkohte pawhin, Fapa pawhin an hre lo. “Fîmkhur ula, inring renga awmin ṭawngṭai rawh u; a hun chu in hre si lo va.

Lal Isua lo kal tûr hi thudik awmsa a nih rualin a lo kal hun tûr a ni leh dâr chu tuman an hre lo. Russia rama Family Radio Service thusawitu, Harold Camping-a chuan ‘May 21, 2011-ah mi thianghlim lâwr a awm ang a, heta lâwr bângte chuan lirnghîng leh ṭâm avângin hrehawm nasa tak an tuar ang’ a ti a.

He mi hlâu hian Russian hmeichhe tleirawl pakhat chu ‘hrehawm nasa tak tuara thih ai chuan’ tiin a intihhlum phah a. He mi niah hian engmah lo thleng a awm leh bawk si lo va, Harold Camping-a pawhin chhuahchhâltu a ngah hle nia sawi a ni. Lal Isua lo kal hun thuah hian rîn hnaih viau emaw, rîn hlat viau emaw a ṭûl lo va, a lo kal ngei dâwn avângin inring renga awm mai tûr a ni. Lal Isua lo kal hma pawh hian thi thut thei vek kan ni a, inring renga kan awm a pawimawh a ni. A ni leh dâr zâtah tu mah buai tûr a ni lo ve!