ISUA PIANNA HMUN

MIKA 5:2
Nimahsela, nang Bethlehem Ephratha, Juda rama sâng tam tak zîngah tê hle mah la, i lak aṭang hian Israel-ho rorêltu tûr chu ka tân a lo chhuak ang a; a lo chhuahna chu hmasâng ata, chatuan aṭangin a ni.

Zâwlnei Isaian kum 700 vêl hma lamah, ‘Kan tân naupang a lo piang a, fapa pêkin kan awm ta,’ a lo ti daih tawh a ni. Thlarau mit chuan a chiang viau ni âwm a ni. Mikan Israel-ho rorêltu lo chhuak tûr a sawi lâwk a thleng dik tlat mai (Mt 2:1).

Jerusalem aṭanga km 8 vêl leka hlaah Bethlehem hi a awm a, khaw lian lo tak a ni a, lal Davida pianna a ni (I Sam 16:1). Thlahtute pianna khua ṭheuhah hming ziak tûrin an kal a. Josefa leh Mari pawh Nazareth-ah chêng ni mah se, Davida thlah an nih avângin Bethlehem-ah an kal a. Isua chu chhiarpui laiin a piang ta a ni. Isua chungchâng lo thleng hi Pathian remruatsa a ni a, Mihring phuahchawp emaw duan lâwk emaw a ni lo.

Aw, nang Bethlehem, ka va ngai tak che êm!
I tlâng chunga hruaitu arsi êng chu;
Ṭapin ka rawn zawng zêl ang che,
Ka Lal pianna lei hmun tlâwm ber chu.

Isua pianna sawi lâwk hian Pathian ropuizia a tilang.