I HUN TI THIANGHLIM LA

I Petera 1:16
“Nangni in thianghlim tur a ni, kei ka thianghlim si a.”

.
Ringtu nuna pawimawh em em chu thianghlim taka kan hunte hman hi a ni a. Kan thinlung leh kan ngaihtuahna te thianghlim taka kan hman chuan a hmangaihna tuikhur hlua kan thlen theihna a ni a. Chu nun thianghlim neih a pawimawhzia hriain William Longstaff-a chuan hla mawi takah a rawn phuah chhuak hial a ni.
.
W Longstaff-a hi Salvation Army dintu William Booth-a thian hnai tak a ni nghe nghe a. Kum 1822 khan Durham, England-ah a lo piang a. Thuhriltu lar, DL moody leh hla phuah thiam hmingthang Ira Sankey nen pawh inthian hnai tak an ni.
.
He hla tha tak hi kum 1882 khan a lo phuah daih tawh a. William Longstaff-a hi Pastor a ni lo a, thuhriltu lar tak pawh a ni hek lo a, hlaphuah thiam tak pawh a ni lo. Sumdawng mi, piangthar tha tak, rinna kawnga mi serious tak a ni tih chauh hriat a ni.
.
He hla a phuahna chhan chu, China Missionary, Dr. Griffith John-a chuan Keswick, England-ah thu a sawi a. I Petera 1:16 “Nangni in thianghlim tur a ni, kei ka thianghlim si a,” tih thupui a nei a, he sermon a ngaihthlak atangin W Longstaff-a hian hla mawi leh tha tak a lo phuah ta a ni.
.
Sumdawng mi a nih angin a hnathawhnaah a practical-a thianghlimna neih tumna rilru lian tak a nei a. Chu chu hlaa rawn phuah chhuakin ringtu tam takte tana thianghlimna kawnga min kaihhruai theitu hla tha tak a lo ni ta a ni.
.
W Longstaff-a chuan kan hunte tithianghlim tur hian Lalpa kan pawl fo a ngai a ni tiin a sawi a. Kan Pathian thianghlimin amah anga thianghlim tura min duh a ni chuan kan hun hlu zawng zawng a tan hmang turin min duh thu a sawi bawk.
.

I hun ti thianghlim la, Lalpa pawl fo rawh,
Amah chu kumkhuain ring tlat zel ang che.