KA AWM ANGIN
Johana 6:37
“Pain mi pek zawng zawng ka hnenah an lo kal vek ang; tupawh ka hnena lo kal chu ka hnawt chhuak tawp lo vang.”
‘Just as i am’ – Charlotte Elliot (1789-1871)
‘Ka awm angin’ – KHB 368
Charlotte Elliot-i chu a tleirawl chhuah laiin malsawmna tinreng a dawng emaw tih mai turin hamthatna tinrengin a nun a bual a. Lem a ziak thiam a, hla a phuah thiam bawk a. Mahse kum 30 a rawn kai chhoh meuh chuan natna khirhkhan tak maiin a tlakbuak ta tlat mai a. Chu chuan nasa takin a taksa a tih chakloh mai bakah a rilru thlengin hnualna nasa tak a thlen hial a ni.
A dam lohna avangin Switzerland Doctor, Dr. Caeser Malan chuan a tlawh a, Dr. Caesar-a chuan, “Pathian hnenah thlamuanna i nei em?” tiin a zawt a. Mahse Charlotte-i chuan a zawhna chu hnawlin chulam engmah a sawi peih loh thu chauhin a chhang a.
Mahse ni rei lo te hnu chuan Charlotte-i chuan Dr. Caesar-a hnenah chuan ngaihdam a dil a. “Dik taka sawi chuan, Kristian ka nih hma hian ka nuna thil tam tak hi tihfai ka duh hmasa a ni” tiin Dr. Caesar-a chu a chhang ta a. Dr. Caesar-a chuan mitmeng dam taka en chungin, “I awm angin lo kal rawh,” tiin a chhang a. Chu chhanna chu Charlotte-i tan a tawk hle mai. Chumi ni atang chuan Pathian a pan ta a ni.
Kum 14 a liam hnu chuan Brighton, England-a Dr. Caesar Malan-a chhanna chu a ngaihtuah let a, he hla mawi tak leh tha tak hi a lo phuah ta a ni.
Keini pawh kan awm ang angin Pathianin min ko a ni tih hre thar ila, paihthlak theih loh nun chu a hnen kan thlen hunah kan paihthla thei zawk dawn a ni. Petra vocalist John Schlitt-a chuan a hla pakhatah, “I awm ang ang khan hmangaihtu che an awm” (There is someone who love you just the way you are) tiin mawi takin a lo sa tawh bawk.
‘Ka awm angin ka lo kal ang, I thisen hlu ka tan a luang; Tin, nangin min sawm avangin. Ka tlantu, ka lo kal’.
